शनिबार दिउँसो तुलसीपुरबाट ९ जना जुवाडेलाई प्रहरीले पक्राउ गर्यो । तुलसीपुर उपमहानगरपालिका वडा नं. ५ ‘ङ’ लाइनमा रहेको गौरव वलीको घरमा अवैधरुपमा जुवा तास खेलिरहेको अवस्थामा ९ जना जुवाडे पक्राउ गरेको प्रहरीले उनिहरुको नाम भने सार्वजनिक गरेन ।
तुलसीपुरका व्यवसायीहरुले ठूलो रकम दाउमा राखेर जुवा खेलिरहेको भन्ने गोप्य सुचनाका आधारमा प्रहरीले जुवाडे पक्राउ त गर्यो तर उनीहरुको नाम भने गोप्य नै राख्यो । सुचना पाउनासाथ प्रहरीले जुवा खेलिरहेको घर घेरा हाली उनिहरुलाई पक्राउ गर्न सफल भएको हो ।
दुई लाखबढी नगदसहित जुवाको खालबाट पक्राउ पर्नेहरु कोको हुन भनी स्थानीयले चासो देखाउन थाले । पत्रकारले जुवाडेको नामवली मागे तर प्रहरीले आनाकानी गर्दै नाम सार्वजनिक गर्न मानेन ।
अन्ततः चौतर्फी दवावपछि प्रहरीले पक्राउपर्ने जुवाडेहरुको नाम सार्वजनिक गरेको छ । शनिबार दिउँसो पक्राउ परेका उनिहरुको नाम आइतबार बिहान मात्र सार्वजनिक गरिएको हो । सर्वसाधारणको नाम तुरुन्तै सार्वजनिक गर्ने प्रहरीले उनिहरुको नाम गोप्य राख्नुमा भने राजनीतिक दवाब भएको हुनसक्ने स्थानीयले आँकलन गरेका छन् ।
पक्राउ पर्नेहरूमा तुलसीपुर –५ का घरधनी ४४ वर्षका गोर्ख बहादुर वली (गौरव), सोहि ठाँउका ६५ वर्षका मिनराज ओली, ४२ वर्षका लिला बहादुर वली, ५५ वर्षका लालबहादुर गुरुङ, ३२ वर्षका नवीन ओली, वर्ष ४४ का पूर्णबहादुर डाँगी, वर्ष ४० का ओमकार ओली, चितवनको भरतपुर उपमहानगरपालिका– २१ का ४३ वर्षिय पुष्पराज घिमिरे र सानोभेरी गाउँपालिका–८ रुकुम पश्चिमका ४१ वर्षिय नवराज वली रहेको इलाका प्रहरी कार्यालय तुलसीपुरका प्रहरी निरीक्षक विनोदराज खत्रीले जानकारी दिनुभयो ।
प्रहरी निरीक्षक खत्रीका अनुसार विशेष सूचनाका आधारमा गरिएको खानतलासीका क्रममा वलीको घरभित्र जुवाको खालबाट नगद २ लाख ५२ हजार ६५, १०२ पत्ता तास र नखोलेको नयाँ तास १ गड्डीसहित ९ जनालाई पक्राउ गरिएको हो । पक्राउ परेकाहरू माथि अनुसन्धान भइरहेको प्रहरीले जनाएको छ ।
तस्वीर : शरद रेग्मी
_5uszOhtA10-1743258474.jpg)
