आशिष के. सी
तुलसीपुर, ०९ पुस ।
नेशनल प्याब्सन दाङको आयोजनामा आजदेखि सुरु भएको जिल्ला स्तरिय बृहत खेलकुद कार्यक्रमको भव्य उद्घाटन गरिएको छ । तुलसीपुर स्थित अरनिको मैदानमा एक औपचारिक कार्यक्रमको आयोजना गरि खेलको उद्घाटन गरिएको हो । नेशनल प्याब्सन दाङका अध्यक्ष भोजराज न्यौपानेको अध्यक्षता तथा पूर्व सिंचाई मन्त्री एवं दाङ निर्वाचन क्षेत्र नं. - ३ का सांसद दिपक गिरीको प्रमुख आतिथ्यता तथा नेशनल प्याव्सनका केन्द्रिय अध्यक्ष सुवास न्यौपानेको विशिष्ट आतिथ्यतामा कार्यक्रम भएको हो ।
कार्यक्रमलाई सम्बोधन गर्दै प्रमुख अतिथि गिरीले नेशनल प्याव्सनले बालबालिकाको नेतृत्व एवं व्यक्तिको विकासका लागी विभिन्न गतिविधिहरु गर्दै आएको भन्दै प्रशंसा गर्नुभयो । साथै उहाँले खेल क्षेत्रको समग्र विकासका लागी आफुले सक्दो पहल गर्ने बताउनुभयो । त्यस्तै अरनिको मैदान तुलसीपुरमा मापदण्ड अनुसारको खेल मैदान निर्माण गर्न सांसद विकास कोषबाट १ करोड रुपैयाँ विनियोजन गर्ने बताउनुभयो ।
त्यस्तै विशिष्ट अतिथि न्यौपानेले नेशनल प्याब्सनले विगतदेखि नै बालबालिकाहरुको सर्वाङ्गिन विकासका लागी विभिन्न गतिविधिहरु गर्दै आएको बताउनुभयो । साथै उहाँले अहिलेको शिक्षा विध्येकले समग्र निजि विद्यालयलाई अङ्कुश लगाउन खोजेको जिकिर गर्नुभयो । शिक्षामा निजि विद्यालयको ठुलो लगानी रहेको भएपनि सरकारले त्यसको उचित मुल्यांकन गर्न नसकेको उहाँको भनाई थियो ।
त्यस्तै कार्यक्रममा नेशनल प्याब्सनका केन्द्रिय उपाध्यक्ष सुबोध डाँगीले बालबालिकाहरुलाई किताबी ज्ञानले मात्र पूर्ण सिकाई नहुने भएकोले व्यवहारिक रुपमा पनि शिक्षित बनाउनु पर्नेमा जोड दिनुभयो । जसका लागी खेलकुद र अतिरिक्त क्रियाकलापको अत्यन्त ठुलो भुमिका रहने उहाँको भनाई थियो ।
कार्यक्रममा नेशनल प्याब्सनका केन्द्रिय उप - महासचिव कुशुम रानाभाट, केन्द्रिय सदस्य प्रकाश शर्मा, बाँके जिल्ला सचिव बेगम चन्द, लुम्बिनी प्रदेश तेक्वान्दो संघका अध्यक्ष विमल रिजाल, यातायात व्यवसायी सुरेश हमाल, विनोद शर्मा, तुलसीपुर खानेपानी उपभोक्ता तथा सरसफाइ संस्थाका अध्यक्ष यमकान्त भण्डारी लगायतले मन्तव्य राख्नुभएको थियो ।
नेशनल प्याब्सन दाङले विद्यार्थीहरुलाई किताबी ज्ञान सँगै खेलकुद र अतिरिक्त क्रीयाकलामा पनि सहभागी बनाउँदै आएको अध्यक्ष न्यौपानेले बताउनुभयो । साथै खेलकुद कार्यक्रममा उपस्थित हुन सबैलाई आग्रह गर्नुभयो ।
पुस ९ गतेदेखि ११ गते सम्म हुने कार्यक्रम अन्तर्गत पहिलो दिन नृत्य प्रतियोगिताको आयोजना गरिएको थियो । नृत्य प्रतियोगितामा डिभाईन टेम्पल एकेडेमी तुलसीपुर प्रथम, अमृत एकेडेमी बिजौरी द्वितिय, राप्ती बाल एकेडेमी तुलसीपुर तृतीय र मिड वेस्ट एकेडेमी शान्तिनगर सान्त्वना स्थान हासिल गर्न सफल भएका छन् ।
त्यस्तै मार्चपासमा डिभाईन टेम्पल एकेडेमी तुलसीपुर प्रथम, पारिजात ईङ्लिस स्कुल तुलसीपुर द्वितिय, हाईलाईट ईङ्लिस बोर्डिङ स्कुल घोराही तृतीय, जीवनज्योति ईङ्लिस स्कुल तुलसीपुर र जनप्रीय ईङ्लिस स्कुल तुलसीपुर सान्त्वना स्थान आउन सफल भएका हुन् । डिभाईन टेम्पल एकेडमी तुलसीपुर मार्च पास र नृत्य दुबैतर्फ प्रथम भएको हो । नृत्य प्रतियोगितामा जिल्लाका २ दर्जन बढि विद्यालयहरुको सहभागीता रहेको थियो ।
कार्यक्रम सुरु हुनु अघी विद्यार्थीहरुले मार्चपास तथा झाकी जुलुस सहित र्याली निकालेका थिए । र्यालीमा जिल्लाका ३ दर्जन बढी विद्यालयका ४ हजार बढी विद्यार्थीहरु सहभागी भएका थिए । बाजागाजा सहित विभिन्न संस्कृती झल्कने झाँकिले तुलसीपुर बजार परिक्रमा गरिएको थियो । 'स्वास्थका लागि खेलकुद राष्ट्रका लागि खेलकुद, खेल्न पाउनु हाम्रो अधिकार हो, हाम्रो नेसनल प्याब्सन राम्रो नेसनल प्याब्सन' जस्ता नारा लेखेका प्लेकार्डहरु लिएर र्यालीमा सहभागी भएका थिए । कार्यक्रममा जिल्ला उपाध्यक्ष ठाकुर डाँगीले स्वागत मन्तव्य राख्नुभएको थियो भने कार्यक्रमको संचालण जिल्ला सचीव सालिकराम कार्कीले गर्नुभएको थियो ।
१० र ११ गतेका खेलहरु भने बेलझुण्डी रङ्गशालामा प्रतिस्पर्धा गराईने कार्यक्रम रहेको छ । भलिबल छात्र/छात्रा त्यस्तै दौड छात्र/छात्रा तर्फ १ सय मिटर, २ सय मिटर, ४ सय मिटर, ८ सय मिटर, १५ सय मिटर र ३ हजार मिटर हुने भएको छ । त्यसैगरि सटफूट, ज्याभ्लिङ थ्रो, हाइजम्प, लङजम्प, त्रिपल जम्प छात्र/छात्रा र रिले दौड १००× ४ सय मिटर, ४×४०० सय मिटर छात्र/छात्रा दुबै तर्फ प्रतिस्पर्धा हुने भएको हो । उत्कृष्ट हुने खेलाडीहरुलाई ट्रफि, मेडल र प्रमाणपत्र सहित पुरस्कृत गरिने छ ।
_5uszOhtA10-1743258474.jpg)
