नेशनल प्याब्सन दाङको आयोजनामा आजदेखि जिल्ला स्तरीय बृहत खेलकुद कार्यक्रम सुरु हुन गईरहेको छ । पुस ९ गते देखि ११ गते सम्म हुने कार्यक्रमको आज मंगलबार एक औपचारिक कार्यक्रमका बिच उद्घाटन गरिने भएको छ ।
नेशनल प्याब्सन दाङका अध्यक्ष भोजराज न्यौपानेका अनुसार तुलसीपुर स्थित अरनिको मैदानमा हुने कार्यक्रमको औपचारिक उद्घाटन बिहान ११:३० बजे पूर्व सिंचाई मन्त्री एवं दाङ क्षेत्र नं. - ३ का सांसद दिपक गिरीले गर्नुहुने भएको छ । त्यस्तै कार्यक्रममा अतिथिको रुपमा नेशनल प्याब्सनका केन्द्रिय अध्यक्ष सुवास न्यौपाने, छिमेकी जिल्लाका अध्यक्षहरु, स्थानीय तहका प्रमुख, शिक्षाविद, खेलकुद क्षेत्रका प्रमुख वा प्रतिनिधि लगायतको उपस्थिति रहने छ ।
जिल्ला सचीव सालिकराम कार्कीका अनुसार ११ बजे झाकी जुलुस सहित मार्चपास सुरु हुनेछ । त्यस्तै ११:३० बजे उद्घाटन कार्यक्रम सुरु हुनेछ । कार्यक्रममा विभिन्न विद्यालयका एक दर्जन बढी सांस्कृतिक नृत्य समेत प्रस्तुत गरिनेछ । उद्घाटन पछि खेलकुद प्रतियोगिता १० र ११ गते बेलझुण्डी रङ्गशालामा हुनेछ ।
प्रतियोगितामा जिल्लाका ५० बढी विद्यालयको सहभागीता रहनेछ । भलिबल छात्र/छात्रा त्यस्तै दौड छात्र/छात्रा तर्फ १ सय मिटर, २ सय मिटर, ४ सय मिटर, ८ सय मिटर, १५ सय मिटर र ३ हजार मिटर हुने भएको छ । त्यसैगरि सटफूट, ज्याभ्लिङ थ्रो, हाइजम्प, लङजम्प, त्रिपल जम्प छात्र/छात्रा र रिले दौड ४ सय मिटर, १६ सय मिटर छात्र/छात्रा दुबै तर्फ प्रतिस्पर्धा हुने भएको हो । उत्कृष्ट हुने खेलाडीहरुलाई ट्रफि, मेडल र प्रमाणपत्र सहित पुरस्कृत गरिने छ ।
कार्यक्रमको सम्पुर्ण तयारी पूरा भईसकेको अध्यक्ष न्यौपानेले जानकारी दिनुभयो । साथै उपस्थितिका लागि सबै जिल्लाबासी, खेलप्रेमी लगायत सम्पुर्णमा आग्रह गर्नुभएको छ । नेशनल प्याब्सन दाङले विद्यार्थीहरुलाई किताबी ज्ञान सँगै खेलकुद र अतिरिक्त क्रीयाकलामा पनि सहभागी बनाउँदै आएको उहाँले बताउनुभयो ।
_5uszOhtA10-1743258474.jpg)
