दाङ तुलसीपुर स्थित डिभाईन टेम्पल एकेडेमीमा दीक्षान्त समारोह सम्पन्न भएको छ । विद्यालयमा अध्ययनरत प्रि-स्कुल पूरा गरेका विद्यार्थीहरूलाई दीक्षित गरिएको हो । विद्यार्थीहरूको एउटा तह पूरा भई अर्कोमा प्रवेश गरेको उपलक्ष्यमा उनीहरूलाई दीक्षित गरिएको हो ।
विद्यालयका प्रिन्सिपल भोजराज न्यौपानेको अध्यक्षता तथा नेसनल प्याव्सनका केन्द्रीय सदस्य बिमल गौतमको प्रमुख आतिथ्यमा कार्यक्रम भएको हो ।
कार्यक्रमलाई सम्बोधन गर्दै प्रमुख अतिथि गौतमले डिभाईन टेम्पलले शिक्षा सँगसँगै बालबालिकाको सर्वाङ्गिन विकासका लागि अतिरिक्त क्रियाकलापमा पनि जोड दिएको बताउनुभयो । बालबालिकालाई किताबी ज्ञानसँगै उनीहरूको चौतर्फी विकासका लागि अतिरिक्त क्रियाकलाप पनि अत्यन्तै महत्त्वपूर्ण भएको उहाँले बताउनुभयो । साथै उहाँले डिभाइन टेम्पल एकेडेमी बालबालिकाको पूर्ण विकासका लागि कोशेढुङ्गा साबित भएको उल्लेख गर्नुभयो ।
विद्यालयका प्रिन्सिपल न्यौपानेले डिभाइन टेम्पलले शिक्षा सँगसँगै बालबालिकाको रुचि अनुसार विविध क्रियाकलापमा सहभागी गराउँदै आएको बताउनुभयो । विद्यार्थीहरूले विभिन्न प्रतियोगितामा उत्कृष्ट नतिजा प्राप्त गर्दै आएको पनि उहाँको भनाइ थियो । बालबालिकाको सर्वाङ्गिन विकासका लागि आवश्यक पर्ने सम्पूर्ण गतिविधिमा विद्यालय जिम्मेवार रहँदै आएको बताउँदै थप योजना अघि बढाएको पनि बताउनुभयो ।
कार्यक्रममा प्रमुख अतिथि, विद्यालयका प्रिन्सिपल, भाइस प्रिन्सिपल, अक्षर सुधार अभियन्ता हिमाल डाँगी, पत्रकार आशिष केसी लगायतले दीक्षित हुने विद्यार्थीहरूलाई प्रमाणपत्र प्रदान गर्नुभएको थियो ।
कार्यक्रममा विद्यार्थीहरूले नृत्य, मन्तव्य तथा आफ्ना प्रतिभाहरू प्रस्तुत गरेका थिए । कार्यक्रमको सञ्चालन विद्यालयकी शिक्षिका अन्जु भण्डारीले गर्नुभएको थियो ।
_5uszOhtA10-1743258474.jpg)
