दाङको तुलसीपुर उपमहानगरपालिका वडा नं. - ९ स्थित सप्तरंगी इङलिस मिडियम स्कुलले "सक्सेस एक्स्पो - २०८१" मनाएको छ । एक्स्पोमा विद्यार्थीहरुले विविध प्रतिभाहरु प्रस्तुत गरेका छन् ।
विद्यार्थीहरूले विभिन्न समुदायको कला, संस्कृती, भेषभुषा समेटिएका नृत्य, गीत, नाटक प्रस्तुत गरेका छन् । त्यसैगरी विद्यार्थीहरुले विज्ञान प्रदर्शनी समेत गरेका छन् । उनीहरूले विज्ञानका विभिन्न आविष्कारहरू नमुनाको रूपमा प्रदर्शन गरेका हुन् ।
विद्यालय व्यवस्थापन समितिका अध्यक्ष ललितजंग शाहको अध्यक्षता तथा तुलसीपुर उपमहानगरपालिकाका सामाजिक विकास समिति संयोजक मान बहादुर रावतको प्रमुख आतिथ्यमा कार्यक्रम भएको हो ।
कार्यक्रमलाई सम्बोधन गर्दै रावतले विद्यार्थीलाई किताबी ज्ञानसँगै व्यवहारिक ज्ञानमा जोड दिनुपर्ने धारणा राख्नुभयो । अबको समय विज्ञान र प्रविधिको समय भएकोले त्यसको सही सदुपयोग गर्न उहाँले विद्यार्थीलाई सुझाव दिनुभयो । साथै उहाँले विद्यार्थी, शिक्षक र अभिभावकको त्रिपक्षीय सम्बन्धबाट शैक्षिक उन्नति हासिल गर्न सकिने कुरामा जोड दिनुभयो । विद्यालयले आयोजना गरेको सक्सेस एक्सपोले विद्यार्थीका विविध प्रतिभा प्रस्तुत गरेको भन्दै उहाँले प्रशंसा गर्नुभयो ।
कार्यक्रममा तुलसीपुर उपमहानगरपालिका कार्यपालिका सदस्य बसन्ता केसी, पर्यटन शाखा अधिकृत झरेन्द्र खरेल, गोरखा मोडेल कलेजका प्रमुख पूर्णबहादुर डाँगी, अप्टिमिष्ट क्लब तुलसीपुरका संस्थापक अध्यक्ष मानबहादुर बस्नेत, घरेलु तथा साना उद्योग महासङ्घ तुलसीपुरका अध्यक्ष लालबहादुर केसी लगायतले सक्सेस एक्सपोमा विद्यार्थीका विभिन्न प्रतिभा अवलोकन गर्न पाएको भन्दै खुसी व्यक्त गर्नुभएको थियो ।
विद्यार्थीलाई पढाइसँगै उनीहरूको रुचि अनुसार विभिन्न अतिरिक्त क्रियाकलापमा सहभागी गराउँदै आएको विद्यालयका प्रधानाध्यापक प्रदीप ओलीले बताउनुभयो । जसका कारण विभिन्न प्रतियोगिताहरूमा विद्यार्थीले उत्कृष्ट नतिजा हासिल गर्दै आएको उहाँको भनाइ थियो ।
कार्यक्रममा विद्यालय व्यवस्थापन समितिका अध्यक्ष शाहले पाठ्यक्रमको सिकाइसँगै संस्कार, संस्कृति र व्यवहारिक ज्ञानलाई जोड दिँदै आएको बताउनुभयो । बालबालिकाको उज्ज्वल भविष्यका लागि विद्यालयले नयाँ ढङ्गले विविध गतिविधि गरिरहेको उहाँले जानकारी दिनुभयो ।
कार्यक्रममा विद्यालयका विभिन्न क्रियाकलापहरूमा उत्कृष्ट हुने विद्यार्थीहरूलाई सम्मान एवं पुरस्कृत गरिएको थियो । विद्यालयका कोर्डिनेटर बिमल नेपालले स्वागत मन्तब्य ब्यक्त गरेको कार्यक्रमको सहजीकरण शिक्षक गोपाल गिरीले गर्नुभएको थियो ।
_5uszOhtA10-1743258474.jpg)
