दाङ तुलसीपुर - ९ बेलुवा स्थित सगरमाथा बालबाटिका इङ्लिस स्कुलको १८ औं वार्षिकोत्सव सम्पन्न भएको छ । शनिबार विद्यालय प्राङ्गणमा भव्य कार्यक्रमको आयोजना गरि १८ औं वार्षिकोत्सव मनाईएको हो ।
विद्यालय सञ्चालक समितिका अध्यक्ष यमकान्त खरेलको अध्यक्षता तथा तुलसीपुर उपमहानगरपालिकाका नगरप्रमुख टिकाराम खड्काको प्रमुख आतिथ्यतामा कार्यक्रम भएको हो ।
कार्यक्रमलाई सम्बोधन गर्दै नगरप्रमुख खड्काले बालबालिकाको सर्वाङ्गिण विकासका लागि शिक्षक, विद्यार्थी र अभिभावकको त्रिपक्षीय सम्बन्ध हुनुपर्ने बताउनुभयो । बालबालिकाको पहिलो पाठशाला घर भएकोले अभिभावकको भूमिकाको बारेमा चर्चा गर्नुभएको थियो । साथै उहाँले निजी विद्यालयको समग्र विकासका लागि आफूले आवश्यक सहयोग र समन्वय गर्न तयार रहेको पनि धारणा राख्नुभयो ।
कार्यक्रममा तुलसीपुर - ३ का वडाध्यक्ष विजय विकले सगरमाथा स्कुलले बालबालिकाहरूलाई किताबी ज्ञानसँगै अतिरिक्त क्रियाकलापमा पनि सक्रिय गराएको भन्दै खुसी व्यक्त गर्नुभयो । शिक्षक, विद्यार्थीको लगनशीलता र अभिभावकको चासोका कारण नै विद्यालयले फड्को मार्दै गएको उहाँको भनाइ थियो ।
कार्यक्रममा तुलसीपुर - ९ का वडाध्यक्ष घनश्याम ढकालले शिक्षा क्षेत्रमा निजी विद्यालयको ठूलो भूमिका रहेको बताउँदै यस क्षेत्रमा सगरमाथा स्कुलले बालबालिकाको उज्ज्वल भविष्यका लागि सकारात्मक भूमिका खेलेको बताउनुभयो ।
कार्यक्रममा उल्लेख संख्यामा अभिभावक, शिक्षक, विद्यार्थी, विभिन्न विद्यालयका प्रधानाध्यापक तथा विभिन्न क्षेत्रका व्यक्तित्वहरूको उपस्थिति रहेको थियो ।
कार्यक्रममा विद्यालयका प्रधानाध्यापक छविकुमार ओलीले विद्यालयको वार्षिक प्रगति प्रतिवेदन र आगामी कार्ययोजना प्रस्तुत गर्नुभएको थियो । विद्यालयको समग्र विकासका लागि वार्षिक कार्ययोजना अनुसार अघि बढेको उहाँको भनाई थियो ।
कार्यक्रममा विद्यार्थीहरूले विभिन्न समुदायको संस्कृति झल्कने नृत्य, गीत, नाटक प्रस्तुत गरेका थिए । त्यसैगरी विभिन्न समुदायको भेषभुषा प्रदर्शन गरेका थिए । साथै उनीहरूले विभिन्न विषयमा मन्तव्य राखेका थिए भने विज्ञानका विभिन्न सामग्रीहरु प्रदर्शन गरेका थिए । वार्षिक परीक्षा तथा विद्यालयका विभिन्न क्रियाकलापहरूमा उत्कृष्ट हुने विद्यार्थीहरूलाई सम्मान एवं पुरस्कृत गरिएको थियो ।
विद्यालयका सहायक प्रधानाध्यापक केशर नेपालले स्वागत मन्तव्य व्यक्त गरेको कार्यक्रमको सहजीकरण विद्यालयका कार्यक्रम संयोजक शरद शर्मा मज्गैँयाले गर्नुभएको थियो ।
_5uszOhtA10-1743258474.jpg)
