डिभाइन एजुकेसन फाउन्डेसन अन्तर्गत डिभाईन टेम्पल एकेडेमी र डिभाइन मन्टेश्वरी तुलसीपुरका शिक्षक, विद्यार्थी र अभिभावकलाई अभिमुखीकरण तालिम प्रदान गरिएको छ । शिक्षाविद तथा शैक्षिक अभियन्ता क्षेत्र प्रसाद ज्ञवालीले विभिन्न चरणमा शिक्षक, विद्यार्थी र अभिभावकलाई अभिमुखीकरण गर्नुभएको हो ।
शैक्षणिक विधि, कक्षाकोठा व्यवस्थापन, प्रविधिको प्रयोग, व्यावसायिक नैतिकता, विषयगत दक्षता, कार्यमूल्याङ्कन, नियमित अध्ययन र अध्यावधिक लगायतका विषयमा शिक्षकहरूलाई प्रशिक्षण दिनुभएको थियो ।
त्यसैगरी अभिभावकहरुलाई असल अभिभावकत्व विषयक प्रशिक्षण दिनुभएको थियो । अभिभावकहरूलाई प्रशिक्षण दिँदै उहाँले भन्नुभयो - "बालबालिकाको भावना, संवेदनशीलता, आचरण, व्यवहार, स्वभाव, आत्मविश्वास, आत्मसम्मान, सिक्ने क्षमता, सामाजिक सम्बन्ध कायम गर्ने सिप विकासमा महत्त्वपूर्ण भूमिका हुन्छ । त्यसैले बालबालिकाको पहिलो विद्यालय उनीहरूको घर र अभिभावक पहिलो शिक्षक हुन् ।"
अभिभावकको शिक्षकसँग भेटघाट र सहकार्य, नियमित शिक्षक– अभिभावक बैठकमा सहभागिता अनिवार्य हुनुपर्ने उहाँको भनाइ थियो ।
यसैगरी बालबालिकाको उमेर अनुसारको विकास र सिकाइका लागि अभिभावकको ज्ञान, सिप र सकारात्मक धारणा अभिवृद्धि गर्न सञ्चालन गरिने कार्यक्रम अभिभावक शिक्षा भएकोले विद्यालयले आयोजना गर्ने अभिभावक शिक्षा कार्यक्रममा अनिवार्य सहभागी हुनुपर्ने उहाँले बताउनुभयो ।
बालबालिकाहरूको सर्वाङ्गीण विकासमा सहयोग पुर्याउन उद्देश्यले कार्यक्रमको आयोजना गरेको फाउन्डेसनका संस्थापक निर्देशक भोजराज न्यौपानेले बताउनुभयो ।
कार्यक्रममा अभिभावकहरुको उल्लेख्य सहभागिता रहेको थियो । अभिमुखिकरण कार्यक्रमको आयोजना गरेकोमा अभिभावकहरुले विद्यालय प्रती खुशी व्यक्त गरेका थिए ।
डिभाइन एजुकेसन फाउन्डेसन द्वारा सञ्चालित डिभाइन टेम्पल एकेडेमी र डिभाईन मन्टेश्वरीमा विगतदेखि नै शिक्षक, विद्यार्थी र अभिभावकहरुलाई नियमित प्रशिक्षण तथा अभिमुखीकरण गर्दै आएको फाउन्डेसनका संस्थापक निर्देशक न्यौपानेले जानकारी दिनुभयो ।
फाउन्डेसनका संस्थापक न्यौपानेको अध्यक्षतामा भएको कार्यक्रमको सहजीकरण विद्यालयका सहायक प्रधानाध्यापक महेश लामिछाने, एकेडेमिक कोर्डिनेटर जीवन लामिछाने र शिक्षिका सुजता डाँगीले गर्नुभएको थियो ।
_5uszOhtA10-1743258474.jpg)
