दाङ तुलसीपुर - ९ दोघरे स्थित पारिजात इङ्लिस स्कुलले १७ औं वार्षिकोत्सव भव्यताका साथ मनाएको छ । विद्यालयका प्रबन्ध निर्देशक बल बहादुर पुनको अध्यक्षता तथा तुलसीपुर - ९ का वडाध्यक्ष घनश्याम ढकालको प्रमुख आतिथ्यता एवं नेशनल प्याब्सन दाङका अध्यक्ष भोजराज न्यौपाने र पारिजात स्कुलका संस्थापक अध्यक्ष हरि प्रसाद भण्डारीको विशिष्ट आतिथ्यतामा कार्यक्रम भएको हो ।
कार्यक्रमलाई सम्बोधन गर्दै प्रमुख अतिथि ढकालले पारिजात स्कुल शैक्षिक क्षेत्रमा अब्बल बन्दै गएको बताउनुभयो । शिक्षक, विद्यार्थी र अभिभावकबीच त्रिकोणात्मक सम्बन्ध कायम राखि विद्यालयले शैक्षिक उपलब्धि हासिल गर्दै आएको भन्दै प्रशंसा गर्नुभयो । साथै उहाँले शैक्षिक क्षेत्रको समग्र विकासका लागि आफूले सक्दो पहल गर्ने धारणा राख्नुभयो ।
कार्यक्रमका विशिष्ट अतिथि न्यौपानेले बालबालिकाप्रती अभिभावकको भुमिकाको बारेमा चर्चा गर्नुभयो । शैक्षिक उपलब्धि हासिल गर्न विद्यालय एक्लैको प्रयासले सम्भव नहुने भन्दै अभिभावक र विद्यार्थी पनि जिम्मेवार बन्नुपर्ने धारणा राख्नुभयो । साथै उहाँले पारिजात स्कुलले शैक्षिक क्षेत्रमा बेग्लै पहिचान बनाउन सफल भएको भन्दै निरन्तरताको शुभकामना दिनुभयो ।
विद्यालयका संस्थापक अध्यक्ष हरिप्रसाद भण्डारीले आफूहरूको निरन्तर सङ्घर्ष र मेहनतका कारण नै विद्यालय गर्व गर्न लायकको बन्न पुगेको बताउनुभयो । विद्यालयलाई यो अवस्थासम्म ल्याइपुराउन साथ दिने अभिभावक, विद्यार्थी, शिक्षक, शुभचिन्तक लगायत सबैलाई उहाँले धन्यवाद ज्ञापन गर्नुभयो । विद्यालयलाई यस क्षेत्रकै नमुना बनाउने प्रयासमा निरन्तर क्रियाशील रहेको उहाँको भनाइ थियो ।
कार्यक्रममा विद्यालयका प्रधानाध्यापक रोमहर्ष शर्माले विद्यालयको वार्षिक प्रगति प्रतिवेदन र आगामी कार्ययोजनाको बारेमा प्रकाश पार्नुभएको थियो । साथै उहाँले विद्यालयको समग्र विकासका लागि गुरु योजना बनाएर अघि बढेको बताउनुभयो । विद्यालयको आफ्नै आधुनिक भवन निर्माणाधीन अवस्थामा रहेको बताउँदै १ वर्षभित्र आफ्नै भवनबाट पठनपाठन सञ्चालन गरिने जानकारी दिनुभयो । साथै उहाँले विद्यार्थीको चौतर्फी विकासका लागि किताबी ज्ञानसँगै खेलकुद र विभिन्न अतिरिक्त क्रियाकलापमा पनि सहभागी बनाउँदै आएको बताउनुभयो ।
कार्यक्रमको अवसर पारी विद्यार्थीहरूबीच वक्तित्वकला प्रतियोगिता समेत राखिएको थियो । कार्यक्रममा विद्यार्थीहरुले नृत्य, गित, कविता, मन्तव्य, नाटक लगायतका प्रतिभाहरू प्रस्तुत गरेका थिए ।
विद्यार्थीहरूले विज्ञान प्रदर्शनी समेत गरेका थिए । विद्यार्थी आफैले तयार पारेका विज्ञानका विभिन्न नमुनाहरू प्रदर्शन गरेका थिए । त्यसैगरी वार्षिक परीक्षा र विभिन्न अतिरिक्त क्रियाकलापमा उत्कृष्ट हुने विद्यार्थीहरूलाई पुरस्कार एवं प्रमाणपत्र प्रदान गरिएको थियो ।
कार्यक्रममा स्वागत मन्तव्य विद्यालयकी शिक्षिका अनिता कँडेलले राख्नुभएको थियो भने कार्यक्रमको सञ्चालन शिक्षक खुमराज पाण्डेले गर्नुभएको थियो ।
_5uszOhtA10-1743258474.jpg)
