मेरिगोल्ड ईङ्लिस बोर्डिङ स्कुलको २८ औं वार्षिकोत्सव तथा अभिभावक दिवस भव्यताका साथ सम्पन्न भएको छ । विद्यालयका प्रधानाध्यापक वाशुदेव रिजालको अध्यक्षता तथा तुलसीपुर उपमहानगरपालिका वडा नं. - ७ का अध्यक्ष राम बहादुर जिसीको प्रमुख आतिथ्यता एवं शिक्षा महाशाखा तुलसीपुरका शिक्षा अधिकृत मन बहादुर खड्काको विशिष्ट आतिथ्यतामा कार्यक्रम भएको हो । कार्यक्रमको मुख्य आकर्षकको रुपमा नेपाली लोकगीत क्षेत्रका चर्चित गायक रामजी खाँडलाई निम्त्याइएको थियो ।
कार्यक्रमलाई सम्बोधन गर्दै प्रमुख अतिथि जिसीले शैक्षिक क्षेत्रमा मेरीगोल्ड स्कुलको भूमिका महत्वपूर्ण रहेको बताउनुभयो । किताबी ज्ञानसँगै विद्यालयले खेलकुद र अतिरिक्त क्रियाकलापमा पनि जोड दिएको भन्दै प्रशंसा गर्नुभयो । साथै उहाँले शैक्षिक क्षेत्रको समग्र विकासका लागि आफूले सक्दो पहल गर्ने प्रतिबद्धता जनाउनुभयो ।
त्यस्तै कार्यक्रमका विशिष्ट अतिथि खड्काले शैक्षिक क्षेत्रमा निजी विद्यालयको ठूलो भूमिका रहेको धारणा राख्नुभएको थियो । साथै उहाँले विद्यार्थीहरूको शैक्षिक उपलब्धिका लागि विद्यार्थी शिक्षक र अभिभावकबिच त्रिकोणात्मक सम्बन्ध कायम रहनुपर्ने बताउनुभयो ।
कार्यक्रममा पुष्पन हेल्थ नेपालका अध्यक्ष तथा वरिष्ठ रेडियोलोजिस्ट डाक्टर पुष्पराज रिजालले बालबालिकाहरूका लागि अभिभावकले उचित समय दिनुपर्ने धारणा राख्नुभयो । साथै उहाँले बालबालिकालाई जङ्कफुड र मोबाइलबाट टाढा राख्नुपर्ने सुझाव दिनुभएको थियो ।
कार्यक्रममा अभिभावक छवि खरालले विद्यालयले संस्कारसहितको शिक्षासँगै व्यवहारिक ज्ञान र अतिरिक्त क्रियाकलापमा जोड दिएको भन्दै खुसी व्यक्त गर्नुभयो ।
कार्यक्रममा विद्यालयका प्रधानाध्यापक वासुदेव रिजालले विद्यालयको वार्षिक प्रगति प्रतिवेदन र आगामी कार्ययोजनाको बारेमा जानकारी दिनुभएको थियो । विद्यालयले किताबी ज्ञानसँगै विद्यार्थीहरूको रुचि अनुसार विभिन्न अतिरिक्त क्रियाकलापमा सहभागी गराउँदै आएको उहाँले बताउनुभयो । साथै उहाँले शैक्षिक गुणस्तर सुधारका लागि विद्यालय एक्लैको प्रयासले सम्भव नहुने बताउँदै विद्यार्थी र अभिभावक पनि जिम्मेवार बन्नुपर्ने धारणा राख्नुभएको थियो ।
कार्यक्रममा विद्यार्थी विशाखा भण्डारी, योजना रिजाल, विपिका केसी र सृष्टि पोख्रेलले मन्तव्य राखेका थिए । उनीहरूले मोबाइल फोनको नकारात्मक प्रभाव, बालबालिकाप्रति अभिभावकको भूमिका, व्यवहारिक र गुणस्तरीय शिक्षा लगायतका विषयमा धारणा राखेका थिए ।
कार्यक्रममा विद्यार्थीहरूले विभिन्न समुदायको संस्कृति झल्कने एक दर्जन बढी नृत्यहरू प्रस्तुत गरेका थिए । त्यसैगरी विद्यार्थीहरूले गीत, कविता लगायत आफ्ना विविध प्रतिभाहरू प्रस्तुत गरेका थिए । कार्यक्रममा विद्यार्थीहरूले विज्ञान प्रदर्शनी समेत गरेका थिए । त्यसैगरी कार्यक्रममा पुष्पन हेल्थ नेपालले निःशुल्क स्वास्थ्य परीक्षणको व्यवस्था समेत गरेको थियो ।
कार्यक्रममा स्वागत मन्तव्य विद्यार्थी सृष्टि पोख्रेलले राख्नुभएको थियो । कार्यक्रमको सञ्चालन विद्यालयका सह-प्रधानाध्यापक सोमराज बस्नेत र विद्यालयकी कोर्डिनेटर रन्जना रिजालले गर्नुभएको थियो ।
गायक खाँडको प्रस्तुति
कार्यक्रमका मुख्य आकर्षक चर्चित लोकगायक रामजी खाँडले आफ्नो प्रस्तुति राख्नुभएको थियो । आफ्ना चर्चित गीतहरू गाउँदै खाँडले सबैलाई नचाउनुभएको थियो । वार्षिक उत्सवको अवसरमा विद्यालयले प्रत्येक वर्ष सफल व्यक्ति सँगै स्थापित कलाकारलाई निम्त्याउने गर्छ । लोकगीत संगीतको संरक्षण र प्रवर्धनसँगै विद्यार्थीहरूलाई उत्प्रेरित गर्न र सबैलाई मनोरञ्जन प्रदान गर्न गायक खाँडलाई निम्त्याइएको विद्यालयकी कोर्डिनेटर रन्जना रिजालले बताउनुभयो ।
_5uszOhtA10-1743258474.jpg)
